2025-05-05 Albisteak
Euskal musika-eszenaren azterketa da zenbakiaren ardatza, genero ikuspegitik begiratuta; datuak, bizipenak eta eszena alternatiboak dakartzate ikerlariek. Beste hiru artikuluk osatzen dute edukia, ekologiaren, soziolinguistikaren eta ekonomiaren inguruko ikerketen ondorioekin.
GAI NAGUSIA: Hala ere… hau gure oholtza da
‘Zaintzen ez den kutisean krema ematea. Musikagintzaren erradiografia feminista’
Jone Exposito Alberdi eta Oli Artola Apeztegia
Euskal musikagintza garaikidearen oholtzako erradiografia feminista eskaintzen da, musika eszenako programazioak aztertuta eta sei musikari elkarrizketatuta. Datuek diote 2024an kontzertuen erdiak gizonez soilik osatutako taldeek eman zituztela; emakumeek presentziaren %20,8 zutela eta emakumez soilik osatutako taldeak %10,3 izan zirela. Horren atzean dauden bizipenak ekarri dituzte elkarrizketatutako musikarien gogoeten bidez.
‘Musika-eszena (trans)feminista Zuk Zeuk Egizu filosofiatik’
Udane Barinagarrementeria Laka
Euskal Herrian Zuk Zeuk Egizu filosofia eta (trans)feminismoa ardatz dituzten musika-eszenetarako hurbilpen etnografikoan oinarriturik, espazio horietan egiten diren praktikak, gogoetak eta proposamenak biltzen dira, horien bidez musikaren esparruaren eraldaketarako ekarpen (trans)feministak jaso eta esperientzia musikala zein modutan berresanahitzen den argitara emateko.
ARTIKULUAK
‘Kultura bat basamortuari’
Jokin Bergara Eguren
Krisi ekologikoaren eztabaida publikoan txosten zientifikoek eta analisi kuantitatibo zorrotzek hartzen dute espazioa, humanitateen eta kulturaren ekarpena bigarren lerro batean utzita. Artikulu honetan, trantsizio ekosozialaren aldeko mugimendu batek kulturarekin izan dezakeen hartu-emanaz gogoetatzen da, «posible denaren ortzimuga kulturala zabaltzeko ezinbesteko tresna» gisa.
‘Erresistentziak zta esaten duenean. BAM eremuko gazteen hizkeren eraldaketa’
Maddi Kintana Morcillo
Baiona-Angelu-Miarritze hiriguneko gazteen hizkera deskribatu eta frantsesaren eraginak eta elebitasunak euskaran sor ditzaketen arazoez eta aukerez dihardu, beti ere gazteen ikuspegitik. Hizkuntzaren jatortasuna erlatibizatu eta hirigunekoari balioa emanez.
‘Metaforen etekin ekonomikoa’
Joseba Permach Martin
Diskurtso ekonomiko hegemonikoak betetzen duen funtzio ideologikoaz dihardu. Horretarako, esku hartze publikoari buruzko hiru kasu aztertzen dira, eta horien bueltan nagusitu ziren diskurtso hegemonikoen eta bertan oso ugariak diren metaforen analisi kritikoa garatzen da, izan zuten funtzio legitimatzaile eta ideologikoa agerian jarriz.
Zenbakia ixteko, Egunen gurpilean sailean, Shu Otero, Jokin Bergara Eguren eta Cira Cresporen gogoetak.
