Liburugintza
Liburuaren eta batez ere euskal liburuaren behaleku izateko bokazioz jaio den gune honek liburuaren inguruko informazioa bildu, aztertu eta eskaini nahi du. Eta informazioa jakintza bihurtu.
Liburuak definizio zabala du, eta are zabalagoa da bere mundua. Edozein delarik euskarria, prozesu baten katebegi bat da liburua, guztiz lotua autorearekin, irakurlearekin, argitaratzailearekin, banatzaile zein liburu dendarekin. Hori guzti hori da liburuaren mundua. Behatokiaren oinarria eta funtsa euskal liburuen katalogoa da, XX. eta XXI. mendeetako fitxa bibliografikoz osatua.
Fitxa bibliografikoak hamazazpi osagai biltzen ditu, horien artean: izenburua, egilea, itzultzailea, moldatzailea, marrazkilaria, argitaratzailea, urtea, bilduma, edizioa, orrialde kopurua, gaia.
Urteroko azterketak eta liburu katalogoak
1976an hasita, urtero-urtero agertu izan dira JAKIN aldizkarian urteko liburu ekoizpenari dagokion azterketa eta liburuen katalogoa. 2006az geroztik, katalogoa webgunean soilik argitaratu da; eta, 2013az geroztik, azterketa osoa ere webgunean bakarrik agertu da, eta paperezko aldizkarian horren bertsio laburtua argitaratu da.
XX. eta XXI. mendeko liburuen katalogoa
Katalogo hau katalogo bizia da, haziz joango dena: hurrengo urteetako liburuen fitxekin eguneratuz joango gara.
Katalogoak biltzen duen informazio guztia jakin-mina duen nornahiren esku dago bilatzaile honetan.