2026-06-16 222 esaldi
«Hirigintza eredu zehatz baten, ustezko segurtasun neurri berrien eta zaintzaren erabateko teknifikazioaren ondorioak begi bistakoak dira. Badagokigu geure buruei galdegitea ea zein maitasun den gaurko haurrak guregandik, jendarte honetatik, hiri eta herri hauetatik jasotzen ari direna».
Salbotx, Nora (2019): ‘Haurrak herriak eraikitzen. Etorkizuneko hiritarrak vs gaurko herritarrak’, Jakin 233-234, 167-182.
Nora Salbotx Alegria (Iruñea, 1973). Magisteritzan eta Psikopedagogian graduatua da, Landa Eremuko Hezkuntzan aditua eta Hezkuntza eta Komunikazioan graduondokoa. Mondragon Unibertsitatean eta Nafarroako Unibertsitate Publikoan irakasle aritutakoa, gaur egun Amaiurko eskola txikiko zuzendaritzan eta maistra lanetan ari da. Hik Hasiko aholkulari, Herri Hezitzaileen sareko kide, Sortzen, EHI, Plaza Hutsa eta bertze hainbat elkarte eta eragilerekin kolaboratzen du hezkuntza aferetan. Irakasleen formakuntzan aritzen da, hizkuntza idatziaren didaktika, landa eremuko hezkuntza eta metodologia aktiboen ildoak jorratuz.
2019an argitaratutako Jakin 233-234 zenbakitik ateratakoa da liburuxkako esaldia. Zenbaki bikoitz horrek maitasunaren ideologiak gure buruak, harremanak eta etxe eta kaleak nola eraikitzen dituen aztertzen du, eta bertan aurkitu daiteke Nora Salbotx Alegriaren ‘Haurrak herriak eraikitzen. Etorkizuneko hiritarrak vs gaurko herritarrak’ artikulua. Baztango Herri Hezitzaileak esperientzian oinarrituta, haurrak subjektu politiko gisa hartzea proposatzen du Salbotxek, haurren begiradak bestelako ikuspegia baitakar: «Jendarte orekatu eta justuagoa lantzera datorren proposamen sendoa litzateke, gure ohiko antolaketaren egiteko moduak zein aldarrikapen zahar eta berriak bere egiten dituena; auzolana, parte hartzea, batzarra, komunitatea, euskalgintza, herrigintza eta feminismoa. Tradizionalki herrigintzako eragile eta kolektibo gisara aitortu izan diren horien multzoari haurren hitza gehitzeko beharraren aldarria dakarrena».
Oraindik ez badaukazu, gogoratu Jakin beharreko 222 esaldi liburuxka hemen eros dezakezula.