2025-02-10 222 esaldi
«Intsumisioaren kultura da herri honek sor dezakeen –sortzen ari den– emaitza kulturalik handienetakoa».
Etxebarria Bilbao, Jose Ramon (1994): ‘Euskal kultura 1994‘, Jakin 85, 37-42.
Jose Ramon Etxebarria Bilbao (Gernika, 1948) fisikaria, unibertsitate-irakaslea, itzultzailea, politikaria eta euskaltzaina da. Hainbat arlotan utzi du arrastoa: euskara ikasteko gau eskoletan, zientzia eta teknologia gaiak euskaraz lantzen, ikasmateriala sortzen, militantzia politikoan, Wikipedian… Bera izan zen Adolfo Suárez Espainiako presidenteari, 1976an fisika nuklearra euskaraz irakatsi ezin zela esan zuenean, erantzuna eman ziona, horretarako bi gauza bakarrik behar zirela: euskara hitz egitea eta fisika nuklearraz jakitea. Miren Rubiok luze elkarrizketatu zuen Jakin 230eko Historia bizia sailean.
Liburuxkako esaldia Etxebarriaren artikuluaren azkenekoa da. 1993-1994ko ikasturtearen errepasoa egiten da testuan, eta ikastolen publifikazioa bideratu duen Buesa legea du aipagai nagusi. Hortik tiraka, kultur arloan ere sumatzen zuen funtzionariotze eta burokratizazio prozesuaz dihardu, mesfidati. Logika horren aurkako joera ikusten du kultur iniziatiba herritarretan eta herri ekimeneko mugimenduetan. Horrixe deitzen dio intsumisioaren kultura, estatuaren logikatik kanpoko ekinbideetan hozitutakoari, eta kulturaren eremu guztietan indartzea aldarrikatzen du.
Oraindik ez badaukazu, gogoratu Jakin beharreko 222 esaldi liburuxka hemen eros dezakezula.