2025-06-18 Albisteak
Mesedez, onartu cookieak eduki honetara sartzeko
Nondik dator tradizioa eta zer dakar berekin? Nork ezartzen du zer hartuko den tradiziotzat? Berrikuntzarekiko zer tentsio sortzen du haren transmisioak? Zer haustura? Auzi horien lanketa dakar zenbaki honek, Ilargi Bengoetxea ikerlariaren begirada antropologikoa eta Ion Celestinoren musikari ibilbidea txirikordatuz artikulu nagusietan. Sustrai Colinak moderatutako mahai inguruan, berriz, bost sortzailek tradizioarekin duten harremanaz gogoetatu dute taldean: Ihitz Iriart, Aner Peritz, Danele Sarriugarte, Ibon Rodriguez eta Oier Zuñiga.
‘Tradizioak gudu zelai, borroka eremu’
Ilargi Bengoetxea Gartzia
Historia garaikideko tradizioen inguruko ikerketa historiko eta antropologiko nagusien azterketa egiten du, eta tradizioek, ordena soziala bermatu ez ezik, bake soziala apurtu egin izan dutela ere azaltzen du Bengoetxeak.
‘Hil zara: euskal musika-lengoaia bat pentsatzeko tesiak. Tradizioa luar pila gisa’
Ion Celestino Manterola
Urteetako gogoeta zein praktika kolektiboak iturri, tradiziozko euskal musikaz dihardu: zer den, nola eta zertarako ezagutu eta baliatu, modernitatearekin eta kultur industria delakoarekin dituen tentsioak… eta komunitate bezala zer potentzial dakarkigun ere landu du.
MAHAI INGURUA
‘Ez gara hutsetik abiatzen. Tradizioa sortzaileen ahotik”
Sustrai Colina
Zer egingo dugu gure iraganarekin? Denborak zeharkatzen gaituen gisan gurutzatzen zaizkigu tradizioak. Ez dago norbere erraiak zabaldu besterik tradizioek bizimodua baldintzatzen dutela ohartzeko. Nork ez du zerbaiten parte sentitu nahi? Nork ez du, halaber, libre bizi nahi? Tradizioa bizi, ulertu, sortu eta birsortzeak duen esanahiaz eta garrantziaz dihardute Oier Zuñiga Perez de Urabain aktore eta marrazkigileak, Aner Peritz Manterola bertsolariak, Ihitz Iriart Casenave kantari, dantzari eta kultur eragileak, Ibon Rodriguez Garcia musikariak eta Danele Sarriugarte Mochales idazle eta itzultzaileak, bost ahots, bost artista, bakoitza bere diziplina, testuinguru eta bizipenetatik.
Zenbakia ixteko, Egunen gurpilean sailean, Shu Otero, Jokin Bergara Eguren eta Cira Cresporen gogoetak.
