2025-02-24 Albisteak
Historia bizia sailean, Paulo Iztueta Armendariz idazle eta eragilea elkarrizketatu du Ibai Iztueta semeak. Aita-semeen arteko elkarrizketak irudikatzen du pentsamendu baten transmisioak dakarren sokari eta korapiloei heltzeko aukera. Iztuetaren bizitza eta ibilbide kultural eta intelektuala ezagutzeko irakurgai aparta.
Bestetik, Nekane Goikoetxeak artikulu batean bildu du Joseba Intxaustik euskararen historia sozialari egindako ekarpenaren garrantzia. Iztuetaren eta Intxaustiren bideak txirikordatu egiten dira aldizkarian zehar zenbait ideiatan, elkar hobeto ulertzeko modua eskainiz.
‘Paulo Iztueta Armendarizi elkarrizketa’
Ibai Iztueta Azurmendi
Paulo Iztueta pentsalari, idazle eta eragilearen bizitzan murgilduko gaitu Ibai Iztueta semeak egindako elkarrizketak, Berastegiko haurtzarotik, Tolosa, Areatza eta Erroman barrena ikasketak egin ostean, Ipiñaburura apaiz eta handik erbestera pasatuz. Parisko Historia eta Soziologia ikasketak, UZEIko lanak, Utriusque Vasconiae argitaletxearen sorrera eta ekarpena, EHUko Pedagogia irakasle… Ibilbide osoan agertuko da euskal pentsamendua, Iztueta semeak, sarreran, aitaren haritik dioen moduan: «pentsamendu propiorik gabe ez dago askatasun propiorik, indarraren jabe den auzoak emandako askatasuna baizik».
‘Joseba Intxaustiren nabigazio-karta katalandarra euskararen historia sozialean itsasoratzeko’
Nekane Goikoetxea Agirre
2023ko udan zendutako Joseba Intxaustiri Seguran iaz eskaini zitzaion omenaldian haren obraren inguruko gogoeta eginik, Goikoetxeak euskararen historia sozialari Intxaustik egindako ekarpen erabakigarria aztertu du artikuluan. Goikoetxearen aburuz, «mapa argi bat» utzi digu Intxaustiren euskararen historia sozialak, «erabil dezagun».
Zenbakia ixteko, Egunen gurpilean sailean, Shu Otero eta Cira Cresporekin batera, hemendik aurrera hirukoa osatuko duen Jokin Bergara Egurenen estreinako testua.
