Maskulinitateak

Maskulinitateak egin, berregin, erdietsi, erdi lortu, aldatu, mutatu eta moldatu egiten dira arian ari. Askatu askatzen ote diren mandatu eta pribilegio patriarkaletik, horixe aztertu nahi du R. W. Connell soziologo australiarrak maskulinitatearen jakintza eremuan funtsezko lantzat jotzen den honetan. Maskulinitate eredu hegemonikoa krisian sartzen den une horiek harrapatu eta ikertu nahi ditu, hain zuzen. Esate batera, gazte prekarizatuei maskulinitate hegemonikoaren onura ekonomikoak iristen ez zaizkienean, ea uzten dioten emakumeen lanaz eta emakumeen “giza balioaz” jabetzeari edo indar gehiagoz eusten ote dioten maskulinitateari; edota emakume feministekin militatzen duten gizonek, maskulinitate egiturak zenbateraino deseraikitzen dituzten edo emozio ukatuak lantzeko terapiekin euren buruak askatzeaz konformatzen ote diren; edo gizon gayak bestelako maskulinitate batzuk edo genero disidentzia errotikoak sortzeko gai ote diren. Bada eraldaketarik? Edo birmaskulinizazio prozesuak indartzen dira? Askatzen al dira? Askatzen al zarete menderatzaile izatetik?