2025-03-03 222 esaldi
«Hauxe da mendebaldar feministentzako egitasmorik funtsezkoena: erreferentzia epistemologikoen esparrua aldatzea, geu baikara ‘gure besteen’ esplotazioa eraikitzen ari garenak.»
Reimóndez Meilán, María (2017): ‘Deszentratzen duten hizkuntzak‘, Jakin 221-222, 73-90.
María Reimóndez Meilán (Lugo, Galizia, 1975) itzultzailea, interpretea, idazlea eta ekintzailea da. Itzulpengintza eta Interpretazioan doktorea da Vigoko Unibertsitatean, baita Implicadas no Desenvolvemento kooperazio feministarako erakundearen sortzailea ere. Bere ikerketa lerro nagusiak feminismoak eta teoria dekolonialak dira, alderdi desberdinak analizatzeko prisma modura: itzulpenetik literaturara, nazioarteko kooperaziotik igaroz; hainbat lan akademiko argitaratu ditu gai horien inguruan. Horretaz gain, literatur esparruan ere argitalpen ugari ditu: itzulpenak, saiakerak, haurrentzako liburuak, olerki bildumak eta eleberriak.
2017ko Jakin jardunaldian hartu zuen parte Reimóndezek, ‘Euskara, generoa, jatorria eta klasea gurutzatzen diren lekua‘ izenekoan, eta hango hizlarien lanekin osatutako zenbakitik ateratakoa da liburuxkako bere esaldia. Artikuluan Reimóndezek mundu justuago batera bidean galego hiztun feminista eta ez-heterosexual gisara dituen pentsamendu oinarriak eta praktikak azaltzen ditu. Hizkuntza gutxitu baten hiztun izateak hegemonia linguistikoaren eta derrigorrezko elebakartasunaren ideiekiko kritikotasuna garatzen laguntzen duen heinean, hori beste zapalkuntzak identifikatzeko eta menderakuntza prozesu horien aurka egiteko erabiltzea proposatzen du. Mundu hobe baten aldeko borrokaren zereginetako bat, horrela, norbere posizio hegemoniko eta pribilegiatuez ohartzea bihurtzen da, borrokatzen diren injustizia horiek gure baitatik erreproduzitu ez ditzagun. Bide horretan proposatzen du marko hegemonikotik at dauden erreferentzia epistemologikoetara hurbiltzea, gure borroketan ze Bestetasun erreproduzitzen diren ohartu eta horiek deseraikitzeko.
Oraindik ez badaukazu, gogoratu Jakin beharreko 222 esaldi liburuxka hemen eros dezakezula.