2025-05-09 222 esaldi
«Guretzat sortzen ez badugu, ez dugu inorentzat sortuko. Baina, aldi berean, guretzako bakarrik balio duenak ez du guretzako ere balio.»
Muñoz Otaegi, Joxean (2004): ‘Gure euskaldun historiak‘ in Jakin 144, 41-47
Joxean Muñoz (Donostia, 1957) gidoilaria, zinemagilea, erakusketagilea, idazlea eta politikaria da. Bartzelonako Unibertsitatean Arte Garaikidearen Historian lizentziatu zen eta Zinemarako Gidoi Idazketarako Masterra ere egin zuen. Gidoigintzan aritu da gehienbat, baina zinema-zuzendaritzan ere lan egin izan du. Poesia, haurren literatura eta prentsako zutabegintzan ere aritu izan da. Erakusketen komisariotzan jardun izan du eta Tabakalera Kultura Garaikidearen Nazioarteko Zentroaren zuzendari nagusia izan zen 2006-2010 artean, zentroaren berrikuntza garaian. 2012an Eusko Jaurlaritzan Kultura, Gazteria eta Kirol Sailburuorde kargua hartu zuen, eta hurrengo legegintzaldian ere Kultura Sailburuordetzan jarraitu zuen, 2020ra arte.
Liburuxkan jasotako esaldia euskal zinemari eskainitako zenbaki batean zetorren, 2004ean argitaratu zena. Artikuluan, Muñozek euskararentzat espazio sinboliko eta erreferentzial bat eraikitzea ezinbesteko dela baieztatzen zuen. Eraikitze horretan euskal zinemagintzak eta telebistak zeukan egoera subordinatua aztertzen zuen, bai Madrilekiko, bai telebista munduan nagusituta zegoen publizista logikarekiko. Horren aurrena, euskal iruditeria propio bat sortuko zuen telebista eta zinemagintza aldarrikatzen zituen Muñozek, gure historiak kontatuko zituena, eta horrela, edonora proiektatzeko moduko zinema sortuko lukeena, ez autonomikoa, ez lokala eta txokokoa, baizik eta gurea eta unibertsala.
Oraindik ez badaukazu, gogoratu Jakin beharreko 222 esaldi liburuxka hemen eros dezakezula.