2025-02-17 222 esaldi
«Bere kontsumoa betetzeko bi planeta eta erdi erabiltzen dituen gizarte batek nekez arinduko du mendekotasuna, beste lurralde batzuk mendean hartuta ez bada».
Igeregi Santamaria, Joanes (2023): ‘Glokalia‘, Jakin 254, 99-105.
Joanes Igeregi Santamaria (Barakaldo, 1985) euskaltzalea eta ekologista da. Humanitateak eta Enpresa lizentziatura egin zuen, eta zirkuitu elektrikoen muntatzaile, harakin eta euskaltegiko nahiz unibertsitateko irakasle lanetan ibili izan da. Garabide Kultur Elkartearekin lankidetza proiektuak garatu ditu Kolonbian, Ekuadorren eta Guatemalan, jatorrizko hizkuntzak biziberritzeko helburuarekin. Horretaz gain, Sukar Horia talde ekologistan eta Algortako Bertsolari Eskolan ere aritzen da. Jakin-en kolaboratzaile izan da 2023-2024 artean, Egunen gurpilean saileko Glokalia atalean. Haren artikulu guztiak webguneko blogean daude eskuragarri.
Esaldiak irudi indartsu bat jartzen du begi bistan, krisi ekosozial globalean Euskal Herriak daukan lekua bistaratzen duena. Energia-burujabetzara gerturatzeko bidean, bertan produzitutako energia berriztagarri industrialaren aldeko apustu aldebakarrekoak berekin dakar kanpoko mineralen beharra eta, beraz, kolonialismo energetikotik askatu nahian kolonialismo mineralera aldatzea. Horren aurrean, Igeregik, energia ekoizpena handitzeaz gain, kontsumoa txikitu ere egin daitekeela gogorarazi nahi du, eta burujabetza erreala izango bada, bietatik beharko dela, halabeharrez. Horregatik aldarrikatzen du nahikotasunaren ideia, hazkundearekin itsututako gizarteari kontrajarri eta energiaren ekoizpen-kontsumo oreka birpentsatzeko.
Oraindik ez badaukazu, gogoratu Jakin beharreko 222 esaldi liburuxka hemen eros dezakezula.