2017-09-17 Albisteak
NOIZ: Urriaren 4an, 19:00etan
NON: Oihaneder Euskararen Etxean, Gasteiz. ORTUÑO aretoan (Montehermoso)
Nork zeri barre egin, zergatik eta zertarako, mugaren alde batean edo bestean kokatzen gaitu umoreak. Posizionatzen gaitu. Eta euskaldunok muga lerro horretan egiten dugu balantza: Mission Pays Basque eta Ocho Apellidos Vascos pelikulak edo ETBren Euskalduna naiz eta zu? saioarekin sortutako harrabotsa horren lekuko. Horixe aztertu du Jakinen 220. aldizkariak. Umorearen eraikuntzari eskaini dio zenbakia. Eta horixe izango dute solasgai Uxoa Anduaga soziologoak eta Laura Mintegi idazle eta EHUko irakasleak mahaiaren bueltan. Biak aldizkariko artikulugileak. Norbere esperientziatik eta euskaldunon ikuspegitik arituko dira eztabaidan umorearen erabileraz eta esanahiaz. Guztia gidatzen Iñigo Astiz kazetaria.