Miren Etxabe, ‘Lau Uxo’ idazle eta feminista aitzindariari aitortza

Emakume Abertzale Batzako kide eta idazle Miren Etxaberi buruzko hitzaldia eskaini dute Galder Unzalu, Lorea Agirre eta Amagoia Gurrutxagak Zarauzko Modelo zine aretoan. Zarauztar ezagunaren ibilbideari errepaso zabala egin diote hizlariek, “Miren Etxabe ‘Lau Uxo’, helgaldi baten etena” izenburupean. Lorea Agirre Jakineko zuzendariak sarreran aipatu bezala, «ahaztura bikoitzera kondenatutako» emakume aurrendari honekiko «justizia ariketa bat» izan da ekitaldia. Saioa kantuan itxi dute Iruri Altzerreka eta Oihana Iguaran bertsolariek, Etxaberen bertso jardunari keinu eginez. 
Hitzaldi osoa ikusgai dago bideoan.

Miren Etxabe Aldai (1903-1993) zarauztarra, idazle, bertsolari, mitinlari eta antzerkigile gisa da ezagun. Emakume Abertzale Batzako kide izan zen eta gerra aurretik kulturgintzan eta emakumeen eskubideen aldeko aldarrian aritu zen, besteak beste. Euskarazko kultur mugimenduan eta euskal feminismoan aitzindari, Euskal Pizkundeko emakumetzat jotzen da. Bere lan digitalizatuak eskuragarri daude Euskal Pentsamenduaren atalean.