2022-06-28 Albisteak
https://www.youtube.com/embed/ojtCZCoEn4I
Gure gertuko historiaren protagonistei ahotsa ematen die Jakinek Historia bizia sailarekin. Oraingoan, Amaia Lasa Alegria idazlea eta, Lorea Agirrek definitu bezala, «poeta fundazional bat» sakon ezagutzeko aukera eman digu Amagoia Gurrutxaga
Urangak. Bide urratzaile gisa bizi izandako esperientzia eta denboraren patxadatik egindako irakurketa oparitu dizkigu Lasak, eta, Agirrek ondo nabarmendu bezala, «geure historia politiko eta kulturalaren mataza osatzen du Lasak bere bizitzaz eta bere
pentsaeraz egiten duen kontaketa biziak». Bere ibilbidearen alde ez hain ezaguna agertu digu, a-e-i-o-u berri hari beste oihartzun bat gehitu diona.
Bestetik, Maider Eizmendi Iraola EHUko irakasleak emakume zientzialariek Berria-n duten presentzia ikertu du, kopurua zein nolakotasuna zainduz.
Gainera, Xabier Eizagirre Gesalaga Jakineko erredakzio buruak 2020ko liburugintza aztertu du.
‘Amaia Lasa Alegriari elkarrizketa’
Amagoia Gurrutxaga Uranga
Amaia Lasa Alegria idazlearen bizitzan eta jardunean sakontzeko aukera eskaini digu elkarrizketak: haurtzaroa Getarian; Magisteritza ikasketak Donostian; Zeruko Argia-rako idazlanak; 60ko hamarkadako lehen poesia aleak; 60ko eta 70etako giro sozial, politiko eta kulturala; emakumearen eta sexu askatasunaren aldarria eta feminismoaren eztanda; Ez Dok Amairurekin eta Joxean Artzerekin izandako harremana; familia bizitzaren eta emakume sortzaile izatearen arteko talkak; irakasle lanak ikastolan zein hezkuntza publikoan; Nikaraguako egonaldia eta iraultza sandinista…
‘Emakume zientzialarien rola eta protagonismoa komunikabideetan’
Maider Eizmendi Iraola
Emakume zientzialari eta akademikoen presentzia eta horien inguruan transmititzen den mezuaren ezaugarriak ikertu ditu Eizmendik Berria egunkarian, estereotipoen presentzia eta jorratzen dituzten diziplinek zeresanik duten aztertzeko. Zientziaz aritzeko iturri gisa baino, sarriago agertzen dira emakumeek zientzian duten egoeraren iturri bezala, ondorioztatu duenez.
‘Euskal liburugintza 2020’
Xabier Eizagirre Gesalaga
2020an euskaraz argitaratutako liburuen azterketa aurkezten da, bai ekoitzitako lanen eta bai ekoizleen nolakotasuna aztertuz. 2020an azpimarratzekoa da produkzioak berak izandako igoera, batik bat pandemia medio, Frantzia eta Espainiako estatuetan ere beherakada eragin duenean.
Zenbakia ixteko, Egunen gurpilean sailean Iñigo Martinez Peña eta Maialen Akizu Bidegainen testu bana; eta, kontrazalean, Dom Campistronek urte hasieran istripuz hildako Leire Iribarne abeslariari eskainiriko omena.
