2014-05-14 Albisteak
dBizi bizikleta sistema publiko %100 elektrikoa jarri dute martxan Donostiako Udalak eta Bonopark-ek, kontzesio publikoa jaso duen enpresak. Aurretik, bizikleta arruntetan oinarritutako sistema bat erabiltzen zen Donostian; orain, aldiz, sistema osoa bizikleta elektrikoetan egongo da oinarrituta.
Bizikleta elektriko bat erabili ez duenarentzat beharbada kontzeptua bera arrotza izango da. Bada, bizikleta elektrikoa, duen motorrari esker, pedalkadak ematerakoan laguntza sistema bat duen bizikleta bat besterik ez da. Donostiako kasuan, sistemak hiru abiadura edo laguntza modu ditu zailtasunaren arabera egokitzeko. Ohiko kanbioak ere baditu, eta, bizikleta arrunt baten moduan erabili nahi izanez gero, itzal daiteke.
Proiektuan gehiago sakonduz, egun 12 estazio daude instalatuta, ehun bizikletarekin. Auzo altuetako bizikleta estazioak oraindik ez daude instalatuta, baina bai planifikatuta. Urteko 365 egunetan dabil, 06:30etik 23:00etara (udan 00:00ak arte).
Bizikleta bakoitza leku batean hartu eta sareko beste edozein puntutan uzteko aukera ematen da. Erabiltzeko behar den txartelak NFC teknologia baliatzen du, Mugi edo Lurraldebus txartelek erabiltzen duten bera. Nahi izanez gero, txartel horietako bat ere erabil daiteke, beste bat poltsikoan eraman behar ez dutenentzat.
Zerbitzuaren urteko abonua 40 eurokoa da, eta bost euroko seguru bat ordaindu beharra dago. Aurreneko 20 minutuak doakoak dira, ondoren ordaindu behar dena igarotako denboraren araberakoa da. Horretarako, bizikleta bakoitzak 3G konexiodun txartel bat eta GPS gailu bat ditu. Orain arte ia 600 pertsona egin dira zerbitzu honen erabiltzaile.
Gurean ez bezala, beste leku batzuetan bizikleta publikoaren inplantazioa aspaldikoa da. Etorkizuneko garraio publikoaren eztabaidan, bizikletaren papera bera aztertzen ari dira gero eta gehiago. Alor horretan bide asko dago egiteko oraindik; Europako iparraldearekin konparatuz gero, gure bide gorri sareak handitu, indartu eta hobetu beharko dira horretarako.
Argi dago, beraz, bizikleta eta bizikleta elektrikoa garraiobide moduan hartzen ari diren garrantzia. Gure hiriburu gehienetan –Bilbo, Gasteiz, Baiona…– badira jada bizikleta publikoko sistemak, elektrikoak ez badira ere, erabilpen eta zabalpen ezberdinekin. Urrunago, Lyon eta Bartzelona aspalditik dira arlo honetan erreferente.
Eztabaida horiek guztiek ingurunearekin, bizikidetzarekin, hiri eta garraio ereduekin… harremana dute, baina teknologiarekin ere zerikusi zuzena dute. Batzuek, Smart aurrizkiaren bidez, inteligenteak diren gailu, egitura, sentsore-sare… berri horiek guztiak bildu nahi izan dituzte. Erronka, hemen, tresna horiek guztiak jendartearen interesekin nola lerratu izango da. Zentzu horretan, Donostiaren adibidea edukitzea oso interesgarria da, arazo zehatz bati erantzuna ematen diolako.