2024-10-02 Albisteak
Donostian da dagoeneko Atef Abu Saif idazle palestinarra, Gazako egunerokoa euskaraz argitaratu berria aurkezteko. Palestinako Aginte Nazionaleko kultura ministro izan da udaberrira arte, eta Donostiako Udalean egin zaion harrera instituzionala baliatu du bertako agintari eta alderdiekin egungo egoera aztertzeko. Azken asteotan lehertu den Libanoko gerra berriaz galdetu diote alderdietako ordezkariek, eta argi adierazi du “Gazako gerra itzalean uzteko” eraso duela Libano Israelek, “eta egin dezakeelako”. Gainera, nazioarteko onespena lortzeko balio izan dio urratsak Abu Saifen aburuz, Gazan gerra kritikatu batetik Europak eta AEBk txalotutako gerra batera igaro baita Libanon.
Nazioarteko komunitateak egin dezakeenaz galdetzean, ez da oso itxaropentsu agertu idazle eta ministro ohia, munduak Palestinari agertutako babesa goxagarri izan zaien arren “berandu esnatu” delako jendea. Egun sarraskiaren erdian harrapatuta dauden milaka zibilen geroaz galdetuta, etsipenez esan du gerra honek ez duela amaiera posiblerik, eta bere bizipenek agertzen dutela gerra bat amaitzean hurrengoa hasten dela. Hala ere, gaurko haurrak etorkizunean herrarik gabe bizitzeko gakoa zehaztu du: “etorkizun bizigarri baten itxaropena behar lukete, eta horretarako eskolak, etxe bat eta lan bat izateko aukera, familia bat sortzekoa eta euren proiektuak aurrera eramatekoa”.