Liburuaren egunaren karietara, euskarazko liburuaren argazkia ekarri du gogora Jakinen Liburu Behatokiak. 2016ko datuen faltan, ekoizpena errekuperatzeko bidean dela pentsa liteke, 2015ean %8 hazi baitzen euskal liburugintza, mende berriko daturik onenetakoa erdietsiz. Euskarazko liburuaren bizitzak, ordea, laburra izaten jarraitzen du, eta hezkuntza eta irakaskuntza arloko liburuek bereganatzen dute ia ekoizpenaren erdia, %42. Gainera, hezkuntza eta irakaskuntza arloko liburuen 10etik 6 kanpoko argitaletxeek ekoizten dituzte. Datu kezkagarria, hezkuntza proiektu gehienak kanpoan diseinatzen direla ondoriozta liteke-eta, horrek dakartzan ondorio guztiekin.

EHUko Ikus-entzunezko Beatriz Zabalondo irakaslearen lau ikaslek Jakin aukeratu dute gradu amaierako lana egiteko. Jakinen historian nahiz aldizkarian izandako eztabaidetan sakonduko dute, eta bakoitzak ikus-entzunezko bana osatuko du: Itsaso Garin ikasleak Joseba Intxausti, Joxe Azurmendi, Joan Mari Torrealdai eta Paulo Agirrebaltzategi jakinlarien inguruko pieza osatuko du, eta elkarrizketak egiten hasi da horretarako; Olatz Lasa ikasleak, berriz, Abertzaletasuna lehen eta orain: nola bizi dute belaunaldi desberdinek ikus-entzunezkoa egingo du; Leire Ikaran ikasleak, bestalde, emakumeak eta literatura gaia landuko du 1987an Jakinen argitaratutako izen bereko monografikoa abiapuntu hartuta; eta, azkenik, Peru Arrasate ikasleak Naziogintzatik estatugintzara izenburupean landuko du gradu amaierako lana.

Euskal pentsamenduaren transmisioa sustatzeko XX. eta XXI. mendeetako euskal pentsamenduaren transmisioa proiektua jarriko du martxan Jakinek 2017ko Elkar Sariari esker. Proiektuaren lehen urratsa Txillardegiren obra ezagutzera ematea izango da. 10.000 euroko diru laguntza jasoko du horretarako Jakinek sariarekin, eta Txillardegiren inguruko liburu bilduma, ikus-entzunezko laburrak, eta haren obra digitalizatuarekin web atari berezia osatuko ditu Jakinek.

«Oso erraza da Aieten esatea ETAk armak bota behar dituela. Botako ditu. 200 kalashnikov nahi badituzu, emadazu aste bat eta lortuko dizkizut, azkar. Merke, gainera». Hala zioen Ramon Labaien politikari jeltzaleak 2013an, Imanol Murua kazetariak Jakin aldizkariko Historia bizia sailerako egindako elkarrizketan. «Zertan bukatuko den? Ez dakit». 2017ko apirilaren 8an izango du erantzuna Labaienen galderak. Ezusterik ezean, egun horretan armagabetuko da ETA, bakearen artisauak bitartekari dituela. Bake prozesuan mugarri izango den eguna.  Horregatik, Jakin aldizkarian ETAren nahiz oro har gatazkaren eta indarkeriaren inguruan idatzitakoak ekarri nahi izan ditugu ostera ere mahai gainera dosierrarekin. Ez guztiak, baina bai esanguratsuetako batzuk. Baita Jakinkideen hitz batzuk ere. Hemen dosierrerako lotura zuzenean.

Hasier Etxeberria (Elgoirbar, 1957) kazetari eta idazlea hil da minbiziaren ondorioz. Idazle nahiz kazetari bezala literaturara estuki loturik egin du bere ibilbide profesionala, eta Jakin aldizkarian ere aritu zen hainbatetan: urteko kultura balorazioa egin zuen 1992an, eta 1994-95ean Egunen gurpilean sailean aritu zen arteaz eta kulturaz bere hausnarketak plazaratzen. Gotzon Garate idazle, hizkuntzalari eta euskaltzaleari Historia bizia sailerako egindako elkarrizketa izan zuen azkeneko lana Jakinen Etxeberriak 2005ean.

UEUren eta Jakinen azken bi urteotako elkarlanari batu zaio Usurbilgo udala. Hiru urtetako lankidetza hitzarmena sinatu dute hiru erakundeek, eta horren emaitza izango da uztailaren 13 eta 14an Usurbilen egingo den Jakin Jardunaldiak, UEUko Udako Ikastaroen baitan. “Usurbil badelako nor”, gogoratu du Lorea Agirre Jakineko zuzendariak, “gure kulturgintzaren memorian eta iruditerian duen lekuagatik. Jakinentzat zentzu osoa du jardunaldiak hemen egitea”. Edukiak lantzen ari da orain Jakin, baina "gaur egungo korapiloetako bati arreta" jartzeko ikastaroa izango dela ziurtatu du Agirrek.