Idurre Eskisabel eta Lorea Agirreren hitzaldiarekin abiatu da UEUk, Gabriel Aresti Euskaltegiak, Bilboko Kafe Antzokiak eta Jakinek elkarlanean antolatutako 'Euskaltzaletasuna eta Feminismoa: zer ikasi, hura elikatu' ikastaroa. Euskaltzaletasunaren eta feminismoaren arteko elkargune eta harremanez jardungo du ikastaroak, eta, bakarka nahiz solasaldian, zazpi hizlarik hartuko dute parte: aipatutakoez gain, Saioa Iraola Urkiola, Jaime Altuna Ramirez, Aizpea Otaegi Mitxelena, Itziar Gandarias Goikoetxea eta Amelia Barquín Lópezek.

2018ak eman duenari erreparatuz osatu du Jakinek 229. zenbakia. Hausnarketa librean nahiz diziplinaka, hamar lagunek osatu dute kultur kronika. Sustrai Colina eta Izaro Ieregi sortzaileek idatzi dituzte testu nagusiak. Laburrago, librean jardun dute Alberto Barandiaran eta Nora Alberbide kazetariek; eta diziplinaka, berriz: Maite Berriozabal bertsolaritzaz, Xabier Gantzarain arte plastikoez, Ines Arrue Unanue zinemaz, Oier Guillan antzerkiaz, Peru Iparragirre literaturaz eta Gorka Erostarbe musikaz. Guztiak Txakur Gorria, Adur, Axpi, Dani Fano, Diego Pallés, Eider Eibar eta Paula Estevezen irudi-balantzeekin osatuta.
Kultur kronikaz gaindi, Garazi Arrula Ruizek itzulpengintzari eta identitatearen auziari heldu dio Gaiak sailean.

Resurreccion Maria Azkueren 922 idazlan katalogatu eta digitalizatu ditu Jakinek Euskaltzaindiarentzat, Bizkaiko Foru Aldundiaren babesarekin. Denetarikoak: artikuluak, liburuak, gutunak nahiz itzulpenak. Lehen argitalpena 1888koa da, eta azkena 1951koa. Horien artean Azkueren lau liburu enblematikoak topatuko ditu erabiltzaileak: Diccionario vasco-español-francés, Cancionero popular vasco, Morfología vasca eta Euskalerriaren yakintza.

Horiek guztiak daude orain herritarren eskura Euskaltzaindiaren webgunean, «Resurreccion Maria Azkue» atalean. Urteka, gaika nahiz hitzen bidez bilaketak erraz egiteko moduan.

Akademiako lehen euskaltzainburua izan zenari omen egin nahi dio horrela Euskaltzaindiak. Jakin ere bat dator Azkueri egin nahi zaion aitortzarekin, bere obra digitalki denon eskura ipiniz.

Jakinen talde historikoak jaso du Gipuzkoako Foru Aldundiaren Urrezko Domina. Pentsamenduan, kultur eragiletzan, argitalpengintzan, euskal kulturan, euskara batuaren bultzadan eta transmisioan egindako lanaren aitortza da saria, Aldundiaren hitzetan.

Urtarrilaren 28an hasiko den 'Euskaltzaletasuna eta Feminismoa: zer ikasi, hura elikatu' ikastarorako lekuak agortu dira. Itxaron zerrenda zabalik da hemendik aurrera matrikulatuko direnentzat. Hileko azken astelehenetan arituko dira solasaldian Idurre Eskisabel Larrañaga, Lorea Agirre Dorronsoro, Saioa Iraola Urkiola, Jaime Altuna Ramirez, Aizpea Otaegi Mitxelena, Itziar Gandarias Goikoetxea eta Amelia Barquín López.

Genero ikuspegitik, bertsolaritzaren azken lau hamarkadak errenditu dituzte horma-irudi bakarrean. Ainhoa Agirreazaldegi, Uxue Alberdi, Miren Artetxe eta Ane Labaka bertsolariek eta Txakur Gorria kolektiboko Malen Amenabarrek eta Mariñe Arbeok osatu dute, «modu artistikoan» irudikatuta eta begi-kolpe azkarrean jasotzeko moduan.