Elgoibarko Izarrak eta Elgoibarko Udalak antolatuta “Joxe Azurmendi: herria, hizkuntza, kultura” hitzaldian egongo gara irailaren 28an, Aita Agirre kulturguneko areto nagusian. Hasier Etxeberriaren omenez antolatzen den “Biba Hasier!” ekitaldiaren baitan elkarrizketan arituko dira Lorea Agirre eta Haritz Azurmendi 19:00etatik aurrera.

Uztailaren 7an eta 8an Usurbilen egindako Jakin Jardunaldian 2040ko Euskal Herria nolakoa izan daitekeen aurreikusi eta nolakoa nahi genukeen irudikatu ahal izan genuen. Aurreikuspen demografikoetatik abiatuta, lurraldearen, zaintzaren eta hizkuntzaren auziak landu genituen lantaldetan. Hitzaldi guztien bideoak ikusgai daude.

Gure gertuko historiaren protagonistei ahotsa ematen die Jakinek Historia bizia sailarekin. Oraingoan, Amaia Lasa Alegria idazlea eta, Lorea Agirrek definitu bezala, «poeta fundazional bat» sakon ezagutzeko aukera eman digu Amagoia Gurrutxaga
Urangak. Bide urratzaile gisa bizi izandako esperientzia eta denboraren patxadatik egindako irakurketa oparitu dizkigu Lasak, eta, Agirrek ondo nabarmendu bezala, «geure historia politiko eta kulturalaren mataza osatzen du Lasak bere bizitzaz eta bere
pentsaeraz egiten duen kontaketa biziak». Bere ibilbidearen alde ez hain ezaguna agertu digu, a-e-i-o-u berri hari beste oihartzun bat gehitu diona.
Bestetik, Maider Eizmendi Iraola EHUko irakasleak emakume zientzialariek Berria-n duten presentzia ikertu du, kopurua zein nolakotasuna zainduz.
Gainera, Xabier Eizagirre Gesalaga Jakineko erredakzio buruak 2020ko liburugintza aztertu du.

Amaitu da proiektuak aurkezteko epea eta 13 proposamen jaso ditu Usurbilgo Udalarekin elkarlanean antolatu dugun Joan Mari Torrealdai bekaren lehen edizioak! Epaimahaiak du hitza orain, eta laster emango dugu erabakiaren berri.

Aurtengo Jakin jardunaldiak demografia izango du ardatz, etorkizuneko Euskal Herria irudikatzeko. Zaintzaren eta hizkuntzaren auziak aletuko dituzte, datu demografikoei berrirakurketa kritiko bat eskainiz. Erronka demografikoa ezbaian jartzeko prest etorriko da Marta Luxan EHUko soziologia irakasle eta demografian aditua, eta Euskadi Irratiko Jakingunean xehetu ditu arrazoiak.

Uztailaren 7an eta 8an egingo da VIII. Jakin Jardunaldia Usurbilen, datu demografikoetatik abiatuta zaintzen eta hizkuntzaren auziei erreparatzeko. Euskal Herria 2040: demografia, lurraldea, zaintza eta hizkuntza izango du izenburu eta UEUren, Usurbilgo Udalaren eta Jakinen lankidetzaren emaitza da. Demografian oinarrituko den arren, Jakineko zuzendari Lorea Agirrek azpimarratu du "erronka demografikoa deritzon hori benetan erronka den" zalantza ere planteatu nahi dela, ikuspegi kritikoa baliatuz. Euskal Herriaren geroa irudikatzeko ariketa izango da, baina ez irudikatzeko soilik, baizik: "etorkizun hori bizigarriago egiteko formulak proposatu eta pentsatzeko", Agirrek azaldu bezala. Zabalik dago izen ematea.